कांग्रेस महासमिति बैठकमा मासु खान नपाइने
माधव धिताल
२४ चैत, काठमाडौं । सोमबारदेखि नवलपरासीमा
हुने नेपाली कांग्रेसको महासमिति बैठकमा शीर्षनेता र कार्यकर्ताहरुका लागि
छुट्टाछुट्टै स्थलमा बासको व्यवस्था मिलाइएको छ । नेताहरुलाई महंगा होटलमा
बासको प्रबन्ध गरिएको छ भने ५ सय कार्यकर्तालाई सुस्ता भवनमा राखिने भएको छ
।
बैठक
आयोजक समितिका संयोजक देवेन्द्रराज कँडेलका अनुसार पार्टी सभापति सुशील
कोइराला, वरिष्ठ नेता शेरवहादुर देउवा, उपसभापति रामचन्द्र पौडेल,
महामन्त्रीद्वय प्रकाशमान सिंह र कृष्ण सिटौला, र कोषाध्यक्ष चित्रलेखा
यादवलाई छुट्टाछुटै राखिने छ ।
सभापति कोइरालालाई वन्दसत्रस्थलमै रहेको
नारायणी भवनमा राखिनेछ भने वरिष्ठ नेता देउवा, उपसभापति रामचन्द्र पौडेल र
महामन्त्री कृष्ण सिटौलालाई गण्डकी भवनमा राखिने छ । यस्तै महामन्त्री
प्रकामानसिंह र कोषाध्यक्ष चित्रलेखा यादवलाई भने त्रिवेणीमै रहेको
ग्रीनल्याण्ड होटलमा राखिनेछ ।
पदाधिकारीबाहेक अन्य नेताहरुलाई
बन्दसत्रस्थल आसपासमा टेन्ट हाउस र फोल्डिङ खाटको व्यवस्था गरिएको छ ।
बैठकमा सहभागी हुने झण्डै २ सय महिला नेतृहरुलाई भने २६ वटा कोठामा बस्ने
व्यवस्था मिलाइएको छ ।
‘ननभेज’ खान नपाइने
महासमिति वैठकमा सहभागी नेता तथा
कार्यकर्ताहरुका लागि खानाका लागि बन्दसत्र स्थलमा १० वटा मेसको व्यवस्था
मिलाइएको छ । बैठक अवधिभर शुद्ध साकाहारी खानाको मात्रै व्यवस्था गरिएको
नवलपरासी सभापति कँडेलले जानकारी दिनुभयो । उहाँले भन्नुभयो,’मासु माछा
खाने मान्छेहरु पनि हुन्छन् । त्यसकारण सवैलाई शाकाहारी खानाको व्यवस्था
मिलाएका छौँ । बैठक अवधिभर नै साधा खानाको मात्रै खुवाउने छौँ ।’ कँडेलका
अनुसार मेसमा खाना नखानेहरुका लागि छुट्टै होटल खानाको व्यवस्था भने
मिलाइएको छैन । उहाँले भन्नुभयो,’पार्टी सभापतिजीले जहाँ खाना खानुहुन्छ
त्यहाँ अरुले खाना नखाने भन्ने कुरा हुँदैन । त्यसैले मेसभन्दा बाहिर खाना
खानेहरुका लागि आयोजकले खानाको कुनै व्यवस्था गरेको छैन । सबैले मेसमा
खानुपर्छ ।’
कार्यकर्तालाई छुट्टै बसोबास
५ सय कार्यकर्ताहरुलाई बन्दसत्र परिसरमै
रहेको सुस्ता भवनमा राखिनेछ । यस्तै नारायणीतिरमा रहेको हलमा करि एक सय जना
कार्यकर्तालाई राखिनेछ भने टेन्टहाउमा थप एक सय ८० जनालाई राखिन आयोजकले
जनाएको छ । करिव एक हजार जनालाई मोक्ष आश्रमभित्रै राखिने छ ।
पत्रकारलाई विशेष व्यवस्था
महासमिति वैठकको समाचार संकलनका लागि
देशभरवाट आउने पत्रकारहरुलाई बास बस्नका लागि छुट्टै व्यवस्था मिलाइएको छ ।
पत्रकाहरुलाई टेन्ट हाउस र फोल्डिङ खाँटको व्यवस्था गरिएको छ ।
यातायातको सुविधा
उद्घाटन समारोहवाट परासीवाट बन्द सत्रस्थल
करिव २४ किलो मिटरको दूरीमा छ । बन्दसत्र सुरु हुने स्थलसम्म जानका लागि
करिव ८० वटा बसको व्यवस्था मिलाइएको छ । यातायातको व्यवस्थाको जिम्मेवारी
पार्टीका नवलपरासी सदस्यहरु शिव खड्का र ऋषि पौडेललाई दिइएको आयोजकले
बताएका छन् ।
करिव २५ सय कार्यकर्ता सहभागी हुने
आयोजक समितिका अनुसार १३ सय ८० जना
महासमिति सदस्यहरु, पत्रकार, कार्यकर्ता, स्वंयमसेवकलगायत २५ सयको बैठकमा
सहभागिता रहने छ । कार्यक्रमको उद्घाटनका दिन भने परासीमा ५० हजार काँग्रेस
कार्यकर्ता र जनता सहभागी हुने नवलपरासी सभापति कँडेलले दाबी गर्नुभयो ।
No comments: